दिन – संगीता बैनीवाल

 बाजरे की सीट्टियां पै
खेत की मचाण पै
चिड्ड़ियां की लुक-मिच्चणी संग
खेल्या अर छुपग्या दिन।

गोबर तैं लीपे आंगण म्ह
हौळे हौळे आया दिन।
टाबर ज्यूं खेल्या,हांस्या-रोया,
खाया-पिया अर जाग्या-सोया दिन।

बाड़ी के खेत सा झट चिटक्या
अर पट चुग लिया दिन।
सांझ ढळी गठड़ी म्ह बंधग्या
घरां लौट डिगरग्या दिन।

दिन के रंगां नै
कोय मुश्कल समझ पाया
जिसनै बी समझ्या
दिन म्ह तैं टोह ल्याया
एक और दिन।