रागनी
देवी अबला पां की जूत्ती, मिले खिताब हजार मनैं,
जब तै बणी सृष्टि, कितने ओट्टे अत्याचार मनैं ।।टेक।।
परमगति हो सती बीर की, पति की गैल जलाई गई ।
मेरी गैल कुकरम होया सै, मैं ऐ शिला बणाई गई।
देख एकली साधु बणकै, कुटिया पर तै ठाई गई ।
करकै शक पवित्रता पै, अग्न परीक्षा कराई गई।
मूर्ख के कहणे तै काड्ढी, देक्खे सृजनहार मनैं ।।
सोकण आला दुःख ओट्टया सै, वंश चलावण की खातर।
कदे बुड़्ढे की गेल्यां ब्याहदी, पूत जमावण की खातर।
कदे बालक कै पल्लै ला दी, लाज बचावण की खातर।
मैं पांच्चां की बहू बणादी, बचन निभावण की खातर।
दा पै लाई चीर उतारे, देक्खे रंगे सियार मनैं ।।
जब तक जोबन ज्यान तै प्यारी, मैं अठमास्सी करदी।
जोबन गया फेर नजर, बदलगी बास्सी लास्सी’ करदी।
बख्शे खोट हजार मेरी, एक पै फांस्सी करदी।
मन्दर म्हं बी इज्जत लुटगी, देव की दास्सी करदी।
नगर वधू रखैल हरम म्हं, कितनी ओट्टी मार मनैं ।।
काग उडाणी करी कदे मैं, बदला मिल्या भलाई का।
किसे तै बात करूं तो कहैं सै, के इतबार लुगाई का।
घरां पराई आग्गै दरजा, मिल्या बिग्यानी जाई का।
जवान उमर म्हं विधवा होग्यी, मिला बुहार कसाई का।
ना खाणा ना सुथरा बाणा, मिल्या बैरी संसार मनैं ।।
बेहूद्दे बुहार ओटती, बहू भाब्बी अर सूं साली।
किते कलबां के बीच नचावैं, करैं किते कोट्ठे आली।
झगड़ैं मरद देवैं आपस म्हं, बुआ बाह्ण मां की गाली।
सभ्य समाज बदलकै चाबी, आत्मा देह करै काली ।
बिकती मोल बहू बणकै यू, देख्या नवा बाजार मनैं ।।
समझ बैसाखी भेड्यां आग्गै, काया मेरी परोस्सी।
बिन नात्ते के कुकरम घर म्हं, कितनी सै नकमोस्सी।
किते देवैं उपहार मेरा, मैं ठाई जां किते खोस्सी।
तन मन बस म्हं नहीं जगत कै, फेर कहैं त्रिया दोस्सी।
सिंहासन की खातर, इन्द्र भेज्जै सै सो बार मनैं ।।
मेले रस्ते शिक्षण संस्था, जीणा रहै हराम मेरा।
कदे पेट म्हं कदे दहेज पै, करदें काम तमाम मेरा।
खटू दफतर म्हं खपूं सू घर म्हं, ना दिक्खै सै काम मेरा ।
घणें पसन्द करें पशुआं ज्यूं, देक्खैं नकशा चाम मेरा ।
नारी की दुश्मन नारी सै, या बी सुणीं तकरार मनैं ।।
हद होग्यी बन्द करो, बलि दिये घणे मित्यान मनै ।
पढ़ लिखकै दुनियांदारी का, इब लेलण द्यो ज्ञान मनैं ।
जितना काम करूं सूं थारा, उतना चाहिए मान मनैं ।
लोड़’ नहीं झूट्ठी पदवी की, रहण दियो इन्सान मनैं ।
रामफल गौड़ तरक्की खातर, उठा लिये हथियार मनैं ।।
