सै दरकार सियासत की इब फैंको गरम गरम।
चौपड़ सार बिछा दी आज्यो खेल्लां धरम धरम।।
लोग दिखावा हाम्बी भरियो आंख मिलाइयो ना
बेशक लोग मचाओ रौल़ा कहकै शरम शरम।
पतनाल़ा पड़र्या जित पड़ना चहिये उसे जगां
पंचां की सिरमात्थै कहकै बोल्लो नरम नरम।
जो चलदी म्हं नहीं चलावै वो पछतावैगा
सारे सपने पूरे कर ल्यो मौका परम परम।
अम्बर -सूरज ,चाँद -सतारे, धरती और हवा
सब म्हारे सैं चोगरदै फैलाद्य़ो भरम भरम।
लोड़ नहीं सै खोट छुपावण की बस ध्यान रहै
खड़तल बोल्लै, न्यूं कहियो सब नंगे हरम हरम।।