करो वोट की चोट

जोरा सिंह
साच कम और झूठ घणी मुश्किल करनी पहचान दिख्खै।।
करो वोट की चोट जुणसा नेता बेईमान दिख्खै।।
तेरा नाम लेकै नै गले मिलैंगे
हां भरवाए बिन नहीं हिलैंगे
भेडियों सी साल चलैंगे दिख्खण मै इंसान दिख्खै।।
करो वोट की चोट जुणसा नेता बेईमान दिख्खै।।।
गंदी बस्ती में भी जावैंगे
बालकां के लाड लड़ावैंगे
तेरे पैरां कै भी हाथ लावैंगे जालिम बणे इंसान दिख्खै।।।
करो वोट की चोट जुणसा नेता बेईमान दिख्खै।।।।
आंख नीर तै अपणी भेवैंगे
सारी जिम्मेवारी तेरी लेवैंगे
चुस्की गोली खूब देवैंगे होता मदिरापान दिख्खै।।।
करो वोट की चोट जुणसा नेता बेईमान दिख्खै।।।।
आणा नहीं बस किसे खोट मै
मतदान होवैगा तेरा ओट मै
जोरा सिंह कह तेरे वोट मै मनै कल का हिंदुस्तान दिख्खै।।।
करो वोट की चोट जुणसा नेता बेईमान दिख्खै।।।।