बाॅडी साॅडी बणा लई तनै यो किसा ढिठोरा सै- विक्रम राही

विक्रम राही
बाॅडी साॅडी बणा लई तनै यो किसा ढिठोरा सै
असल बात तै लाख दूर किस ढाल का छोरा सै
जोंगा जीप ट्रैक्टर डीजे बणा लिया तमनै
बेहुदा फनकार आईडिल गिणा लिया तमने
ताऊ चाच्यां कै तेरी खातिर हाथ लठोरा सै
कद्र बाप की ना समझी और माँ किस हाल सै
बाहण कै ऊपर लाख नजर यो के जंजाल सै
काच्चा कोढ समझ ले इसनै ना तो तु जलखोरा सै
बाप तेरे नै ध्याडी करकै पढ़ा लिया था तु
जितने लाड सै दुनिया के लडा लिया था तु
वो चैप्टर क्यूँ तेरी किताब का आज भी कोरा है
कलम चली ना सुर लकडया आर लय भी तो ना थी
जिनकी बोलण लाग्या असली जय भी तो ना थी
मनै बता दे कलाकार किस ढाल चठोरा सै
उस गाबरु नै कित गिणल्या जो मर्ज नै समझे बिन
खामैखा हिमायती हो कै कहै आगे आच्छे दिन
छाती ताणकै न्यू कहदे जो यो म्हारा गौरा सै ।
कच्ची मंदी बात करणिया ना बेटी बाहण का
उस माणस नै एकै चस्का लूट कै खाण का
कच्चे घरां बिचालै उसका पक्का नौरा सै
मनै तमनै वो रोज बेच दे ना हामनै बेरा
जात धर्म और ऊंच नीच का टैंडर वो लेरा
विक्रम राही जाणै कोण तनै उसका टोरा सै

Leave a Reply

Your email address will not be published. Required fields are marked *